അർബുദം

അർബുദം 

***************

ടൂത്ത്പേസ്റ്റര്ബുദകാരണമെന്നുകേട്ടോടി - 

യുമിക്കരിക്കായി ഞാൻ പലയിടത്തും 

ഉമി തിരഞ്ഞാദ്യംനെല്ലുകുത്തും മില്ലിലേക്ക - 

വിടെനെല്ലില്ലയെന്നറിഞ്ഞു വീണ്ടുമോടി 

നെല്ലുകൾ വിളയും പാടം തിരഞ്ഞു ഞാൻ  

തെല്ലും മടികൂടാതൊട്ടും വിശ്രമമില്ലാതെ 

നെൽക്കതിർ കൊത്താൻ തത്തയില്ലന്നറിഞ്ഞു -

ത്സാഹഭരിതനായി ഞാൻ വീണ്ടുമോടി

ഓടി ഞാൻ നെൽപ്പാടങ്ങൾ തേടി വീണ്ടും 

പാടത്തിലോ കിളികളുമില്ല, കറ്റയുമില്ല 

പാടത്തു പാറിനടക്കും പൂത്തുമ്പിയുമില്ല     

പാടവരമ്പത്തിലോ  വെള്ളക്കൊക്കുമില്ല 

ചാഴിയും, ചേറും , ചെറുമിയുമില്ല  

ചേറ്റിൽ ചാടും തവളകളുമില്ലാ പാടം  

ചെമ്പരത്തിയില്ല, ചുവന്ന ചെത്തിയില്ല -

ന്നമ്പരന്നു  പാടത്തിനോരത്ത്‌നിന്നനേരം 

പാടമിരുന്നിടത്തിതെന്താണീ  കാഴ്ചകൾ !!   

പേസ്റ്റ്ഫാക്ടറിയും, മൊബൈൽ ടവറും

തൊട്ടടുത്ത് കൂറ്റനായുയർന്നൊരു  കെട്ടിട -  

മതർബുദ രോഗാശുപത്രിയാണത്രെ ....

******************************

 (വൈക്കം ശ്രീരാമൻ )

***********************