മദ്യം

ചേതനയറ്റ ആ കുഞ്ഞിന്റെ ശരീരം ഓപ്പറേഷൻ തീയറ്ററിന്റെ മുൻപിൽ നിന്നും ഏറ്റുവാങ്ങുമ്പോൾ കണ്ണുനീർ വറ്റിയ അയാളുടെ കണ്ണുകൾ നിർജ്ജീവമായിരുന്നു. അഞ്ചു വയസ്സുള്ള അയാളുടെ കുഞ്ഞു മകൻ, തന്റെ കുഞ്ഞനുജത്തിയെ കാണാനായി അച്ഛന്റെ കൈകൾ പിടിച്ചു താഴേക്ക്‌ വലിച്ചു.

ഏതോ ഒരുത്തൻ മദ്യപിച്ചു അമിതവേഗത്തിൽ വാഹനമോടിച്ചതാണ്. നിയന്ത്രണം തെറ്റിയ അവന്റെ വാഹനം, എട്ടുമാസം ഗർഭിണിയായ ഇയാളുടെ ഭാര്യയെ ഇടിച്ചു വീഴ്ത്തി. അപകടം നടക്കുമ്പോൾ ഒരു കടത്തിണ്ണയിൽ നിന്നുകൊണ്ട്  ഇയാളോട് ഫോണിൽ സംസാരിക്കുകയായിരുന്നു അവൾ. അവളുടെ നിലവിളി ഇപ്പോഴും അയാളുടെ കാതുകളിൽ മുഴങ്ങുന്നുണ്ടു.

 ഡോക്ടർമാർ കിണഞ്ഞു പരിശ്രമിച്ചു കുഞ്ഞിനെ ജീവനോടെ രക്ഷിക്കുവാൻ...

അയാൾ ആ കുഞ്ഞിന്റെ ചേതനയറ്റ ശരീരം, തണുത്തു വിറങ്ങലിച്ച തന്റെ ഭാര്യയുടെ മാറിലേക്ക് കിടത്തിയിട്ട്, മൊബൈൽ ഫ്രീസറിന്റെ വാതിൽ അടച്ചു...

- രഞ്ജിത്കുമാർ. എം