നുണയെ പ്രേമിക്കുന്ന പുല്ലിംഗം അഥവാ സ്ത്രീ ലിംഗം .

ചില നുണകൾ

ചന്തത്തിൽ ചിന്തിക്കാൻ 

എന്തൊരാനന്ദമെന്നോ !

വാരിയെടുത്ത്

ഒരുമ്മ കൊടുക്കാൻ തോന്നും .

അതിൽനിന്നൊരു

പൂ പറിച്ചെടുത്ത്

നെഞ്ചിൽത്തന്നെ ചൂടാൻ തോന്നും .

ഇറ്റുവീഴുന്ന തേൻതുള്ളിയിൽ

ഈച്ചയായ് ചത്തുകിടക്കാൻ തോന്നും .

പഴകിയ വീഞ്ഞുപോലെ

മത്തടിച്ച് നുണയുടെ കാൽക്കീഴിൽ

സാഷ്ടാംഗം തന്നെ കിടക്കാൻ തോന്നും .

വടി കുത്തി

മുടിയും നരച്ചു വരുമ്പോഴും

ഇനിയും ചത്തില്ലേയിത് ? എന്ന് 

കളിയാക്കാനെങ്കിലും

ചോദിക്കാനാവാതെ

ചുളിഞ്ഞ തൊലിയിൽ തലോടി 

"എന്റമ്മച്ചീ"ന്ന് ഒരു കുസൃതി നുള്ളിക്കൊടുക്കാനെ തോന്നൂ .

മുമ്പേ സ്നേഹിച്ച

പ്രിയങ്കരമൊടുവിൽ 

വിഷംതന്നുപോകുമ്പോൾ

പുതിയ നുണയുടെ ഉന്മാദത്തെ

പ്രേമിച്ചു പ്രേമിച്ചു ഞാനൊരു

പുല്ലിംഗമകാനേ തോന്നൂ !

അഥവാ

സ്ത്രീലിംഗമാകാനേ തോന്നൂ ! 

ആമച്ചൽ ഹമീദ് .