മഴയിലെ കിളി

മഴയിലെ കിളി

മഴയും നനഞ്ഞവൾ, മിഴിയും നനഞ്ഞവൾ,

മൊഴിയും നനഞ്ഞവൾ, ഇണക്കിളി നീ.

ഏകാന്ത രാത്രിയിൽ, എൻ മലർത്തോപ്പിൽ നീ

ഈറൻ നിലാവായി വന്നു നിന്നു..

ഈറനണിഞ്ഞ നിൻ തൂവർണ്ണത്തൂവലെൻ

ചുണ്ടിനാൽ തോർത്താൻ കൊതിച്ചുപോയ് ഞാൻ

എന്നിട്ടുമെന്തിനായ്‌ എന്നെ തനിച്ചാക്കി 

ദൂരെ നീ പാറിപ്പറന്നു പോയി?

 കാണാത്തിടത്തേക്കു പറന്നു പോയി.

അകലെയാചില്ലയിൽ, ആഷാഢസന്ധ്യയിൽ

അനുരാഗവിവശൻ ഞാൻ കാത്തിരുന്നു

പിടയും നിന്നാത്മാവിൻ, ഹൃദയത്തുടിപ്പുകൾ 

അനുദിനം കാതോർത്തു ഞാനിരുന്നു,

ആരോരുമറിയാതെ കേട്ടിരുന്നു, 

സ്വപ്നങ്ങളോരോന്നു കോർത്തിരുന്നു.

********************

ശ്രീരാമൻ, വൈക്കം