ഓർമ്മപ്പെടുത്തൽ.....

ജീവന്റെ ശ്വാസമേ ,നീ മാത്രമീ പ്രളയ യാത്രയിൽ,
ജാതി ,' മതമില്ലാതെ, തുണയേകി തണലായി ,
ജീവനെമുറുകെപ്പിടിച്ചുദു:ഖസാഗരത്തിന്റെ,
ജീർണ്ണിച്ച ഗോവണികളിറങ്ങുവാൻ
കൈനീട്ടീടവേ,

ഒഴുക്കു നിലയ്ക്കാത്ത മലവെള്ളപ്പാച്ചിലിൽ
ഒഴുകിപ്പൊലിഞ്ഞതുമെത്രയോ ആത്മാക്കൾ,
ഒരു ജന്മമത്തിനധ്വാനം കൊണ്ടു നേടിയ തൊക്കെയും,
ഒഴുകിയൊലിച്ചങ്ങു തീരുന്ന മാത്രകൾ,

വെട്ടിപ്പിടിച്ചതും ചേർത്തു തിരിച്ചതും
വെള്ളത്തിൻ വായ്ക്കരി പോലെയൊലിച്ചു പോയ്,
വളരുമിരുളിന്റെ വേറിട്ട കാഴ്ചകൾ കാണുവാൻ,
വയ്യാതെ മുഖം പൂഴ്ത്തിയലറിക്കരഞ്ഞു പോയ്,

നിലയില്ലാ ,നീന്തിക്കയറുവാനാവില്ല
നീ തന്നെ തുണയെന്ന പ്രാർത്ഥന മാത്രമായ്,
തുഴയേന്തി കരുത്തരായ് കരളിലെ സ്നേഹമായ്,
തുണയേകി നിന്നോരീക്കടലിന്റെ മക്കളേ,

അണകെട്ടിനിർത്തിയ രോഷാഗ്നിയെല്ലാം,
അണമുറിയാതാർത്തു പെയ്തങ്ങു നിന്നൂ
അരുമക്കിടാങ്ങളെ ചേർത്തു പിടിക്കുവാൻ
അമ്മയേപ്പോൽ പ്രകൃതിക്കരങ്ങൾനീട്ടീടവേ '

ദുരിതങ്ങളൊഴിയാതെപെയ്തു തോർന്നീടിലും,
ദു:ഖത്തിലാഴാതെ കൈകോർത്തു നിൽക്കുവാൻ,
കേരള ജനതയ്ക്കു കരുത്തു നൽകീടട്ടേ
ഒത്തൊരുമതൻ ശക്തിയീ ഭൂമിയിൽനിറയട്ടെ,