തിരസ്കരണത്തിന്റെ പാതകൾ

മുന്നിലൂടെ മുറിഞ്ഞുപോകുന്നു തിരസ്ക്കരിക്കപ്പെട്ട നന്മകൾ 
മണ്ണിന്റെ മാറിലുറഞ്ഞുപോകുന്നു അധ്വാനത്തിന്നുറവകളും 
ചോരുന്ന മിഴികളും മൊഴികളും മറന്നകന്നുപോകുന്നചിന്തകൾ
ചേതനയറ്റൊരു കാലത്തിൻ കുരുക്കിൽ കുടുങ്ങിയോ ?

സാന്ത്വനത്തിന്റെ തൊട്ടിലുകളിലിന്നുയർന്നു കേൾപ്പതു 
തിരസ്കരണത്തിന്റെ രോദനങ്ങൾ ,അലമുറകൾ ,
ജനനിയും ധരിത്രിയും അവഗണനയുടെ പുറ്റുകൾക്കുള്ളിൽ 
ജന്മശാപം ചുമന്നു നൊമ്പരത്താലെ നെടുവീർപ്പാറ്റവെ ,

അടയാളങ്ങളോ, അപായങ്ങളായണയുന്നെവിടെയും
അടിച്ചമർത്തപ്പെട്ട വിതുമ്പലിന്റെ നീതി ,നിഷേധത്തിന്റെ 
അടക്കിവയ്ക്കാനാവാത്ത തിരസ്കരണത്തിന്റെയഗ്നി 
ആളിപ്പടരേണ്ടതുണ്ടിന്നിന്റെമനസ്സാം അടർക്കളങ്ങളിൽ ,