പനിനീർ പുഷ്പം

പുഞ്ചിരി വിടരുമെൻ വദനത്താലൊളിപ്പിച്ചയെൻ
എരിയും ഹൃദയത്തിന്റെ വേദന നീയറിയുന്നുവോ പ്രിയനെ
നീയിന്നകലെയെന്നാകിലും മധുരമാം പ്രണയത്തിനോർമ്മകൾ
എന്നിൽ തിരതല്ലുമൊരു കടലായ്ത്തീർന്നിടുന്നു
കാലചക്രം കടന്നു പോയി ഋതുക്കളേറെ വന്നുപോയി
എന്നിട്ടും നീയെന്തേ ഒരുമാത്രയെന്നരികിലണഞ്ഞില്ല
നീ തന്ന പ്രണയവസന്തത്തിനോർമ്മപൂക്കൾ
വാടാതെ ചിതറിക്കിടക്കുന്നുവെൻ ഹൃത്തിനുള്ളിൽ
മറവിതൻ ആഴിയിൽ മറഞ്ഞതില്ല വർണ്ണമേതും മങ്ങിയതില്ല
എൻ ഹൃദയരക്തം ചീന്തിയതിൻ ശോഭയേറിടുന്നു
എന്നിൽ നിന്നകന്നുപോയയെൻ പ്രിയനെ
ഒരു പനിനീർ പുഷ്മമായ് ഞാന്‍ വിടർന്നുനില്‍ക്കാം
എന്നിലെ സ്നേഹമധു നിനക്കായി മാത്രം കരുതിവെയ്ക്കാം
ഒരിക്കല്‍ കൂടിയൊരുമാത്രയെന്നിൽ വന്നണയുമോ ഒരു ശലഭമായ്....

- പൗർണ്ണമി ജോ